მიმდინარე ომმა, ლიბანის რაკეტებმა და უპილოტო საფრენმა აპარატებმა ისრაელში ერთ-ერთი მთავარი პრიორიტეტი მიანიჭეს ლაზერული იარაღის შემუშავებას, რომელიც შექმნილია ამგვარი საფრთხეების შესაჩერებლად. ცაჰალში აცხადებენ, რომ “რაფაელის” მიერ წარმოებული ახალი ინოვაცია- „მაგენ ორის” ლაზერული თავდაცვის სისტემა საზღვრებთან უკვე მომავალ წელს განთავსდება.

რა ვიცით ახალ ინოვაციაზე?

ლაზერული სისტემა ინტეგრირებული იქნება “რკინის გუმბათთან”, რომელიც ასევე შეიქმნა რაფაელის მიერ და ფუნქციონირებს 2011 წლიდან. გეგმის მიხედვით, დახვეწილი ალგორითმი დაადგენს, როდის უნდა გააქტიურდნენ ლაზერები და როდის გაუშვას რკინის გუმბათმა „ტამირის“ ჩამჭრელები.

„რკინის გუმბათის“ მსგავსად, ლაზერულ სისტემას შეეძლება რაკეტების, ნაღმტყორცნების,  ბომბებისა და უპილოტო საფრენი აპარატების ჩაჭრა. თუმცა, ლაზერული სისტემა შექმნილია იმისთვის, რომ შეავსოს რკინის გუმბათი და არა,  ჩაანაცვლოს იგი.

აღსანიშნავია, რომ “რკინის გუმბათი” ახერხებს ისრაელისკენ  გასროლილი საჰაერო საფრთხის 90%-ზე მეტის განადგურებას. სისტემას უჭირდა ჰეზბოლას ფეთქებადი დრონების ჩაჭრა და ეს ქმნიდა დამატებით აქტუალობას ლაზერული სისტემის შემუშავებისთვის.  აქვე უნდა ითქვას ისიც,  რომ სირთულე ძირითადად საფრთხის გამოვლენასა და „კრიმინალიზაციაშია“, ანუ სისტემა  დარწმუნდეს,  რომ ეს მართლაც მტრის თვითმფრინავია და არა ისრაელის საჰაერო ძალების.

იაფი, ეფექტური, სწრაფი

პირველ რიგში, ლაზერის მუშაობის ღირებულება ძალიან დაბალია. თითოეული „გასროლის“ ფასი მხოლოდ რამდენიმე დოლარია, მაშინ როცა „რკინის გუმბათის“ სისტემით გაშვებული Tamir-ის ყოველი ჩამჭრელის საშუალო ღირებულება 50 000 დოლარია.

გარდა იმისა, რომ გაცილებით იაფია, ვიდრე ტრადიციული საჰაერო თავდაცვა, ლაზერული სისტემა არ საჭიროებს გადატვირთვას. ამავდროულად,  ლაზერი ურტყამს მიზანს წამებში, ბევრად უფრო სწრაფად, ვიდრე კინეტიკური ჩამჭრელები.

ეჭვგარეშეა, რომ Magen Or-ის ლაზერული სისტემის გამოჩენა საზღვრებზე  მკვეთრად და დადებითად გააუმჯობესებს ისრაელის შესაძლებლობებს.

და ბოლოს,  ისრაელის მოკავშირეები ყურადღებით აკვირდებიან ამ რევოლუციური ტექნოლოგიის განვითარებას. 2022 წლის დეკემბერში, ამერიკულმა თავდაცვის გიგანტმა Lockheed Martin-მა გამოაცხადა პარტნიორობის ხელშეკრულება რაფაელთან, რათა შეემუშავებინა “Magen Or”-ის საექსპორტო ვერსია ამერიკული ბაზრისთვის.

ერთობლივი პროგრამა მიზნად ისახავს რაფაელის მიერ შემუშავებული ტექნოლოგიის გამოყენებით საექსპორტო სისტემის განვითარებას.