ისრაელურმა სტარტაპმა „Scanary-მა“ წარადგინა ინოვაციური სისტემა, რომელიც საშუალებას იძლევა, საზოგადოებრივად ხალხმრავალ ადგილებში — სტადიონებზე, აეროპორტებსა და სავაჭრო ცენტრებში — ადამიანების უსაფრთხოების სკრინინგი მოხდეს სწრაფად, შეჩერების, რიგებისა და პირადი სივრცის დარღვევის გარეშე.

თელ-ავივში დაფუძნებული კომპანია ამ კვირაში საჯაროდ წარდგა და განაცხადა, რომ უკვე დასრულებულია სისტემის ტესტირება, რომელიც საათში 25,000 ადამიანს ამოწმებს მოძრაობისას, იარაღის, ასაფეთქებლებისა და სხვა საფრთხის შემცველი ნივთების დასადგენად — ისე, რომ მოქალაქეებს არც ქამრის მოხსნა მოუწევთ, არც ტელეფონის ამოღება ჯიბიდან.

სისტემის ხელმძღვანელია დოქტორი გიდეონ ლევიტა, ისრაელის თავდაცვის სისტემების კომპანია Rafael-ის ყოფილი მთავარი ინჟინერი, რომელმაც წვლილი შეიტანა „რკინის გუმბათისა“ და ტანკების დაცვის სისტემის — „Trophy“-ს განვითარებაში.

სტარტაპის აღმასრულებელი დირექტორის, რონენ იაშვიცის თქმით, ტექნოლოგია ხელოვნური ინტელექტის, რადარისა და კომპიუტერული ხედვის შერწყმით მუშაობს, და შეუძლია განსაზღვროს ადამიანის ტანსაცმლის ქვეშ დამალული იარაღის ტიპი, ფორმა და მასალა — იქნება ეს მეტალი, პლასტმასი თუ სითხე.

„მნიშვნელოვანია, რომ სისტემა არ იყენებს სახის ამოცნობას, არ აგროვებს ბიომეტრულ მონაცემებს და სრულად იცავს პირად სივრცეს,“ — ამბობს იაშვიცი.
„ეს არის უსაფრთხოების მომავალი — რიგებისა და დაბრკოლებების გარეშე.“

სკანირების პროცესი 2 წამზე ნაკლებ დროს მოითხოვს.
გაფრთხილების შემთხვევაში დაცვის თანამშრომელს ეგზავნება ვიდეოჩანაწერი, სადაც მითითებულია პოტენციური საფრთხე და მისი მდებარეობა ადამიანის სხეულზე.

სისტემის გამოყენება შესაძლებელი იქნება სკოლებში, აეროპორტებში, მეტროსადგურებში, სავაჭრო ცენტრებში და სპორტულ სტადიონებზე. სტარტაპმა უკვე მიიღო ევროპული CE და GDPR სერტიფიკატები, ახლა კი აშშ-ის ბაზარზე შედის.