სამი მძევალი, რომლებიც ღაზის სექტორში 484 დღის განმავლობაში ჰყავდათ დატყვევებული  ისრაელში 1-ელ თებერვალს დილით დაბრუნდა. ესენი არიან იარდენ ბიბასი, შმუელ (კიტ) სიგალი და ოფერ კალდერონი. ისინი გაიტაცეს 2023 წლის 7 ოქტომბერს კფარ აზასა და ნირ ოზის კიბუციებიდან. მათი დაბრუნება მოხდა  ჰამასთან გაცვლითი გარიგების პირველი ეტაპის მეოთხე რაუნდის ფარგლებში.

მძევლების გადაყვანა დილით ადრე (დაახლოებით 8:30 საათზე) დაიწყო ღაზის სექტორის ორ სხვადასხვა ლოკაციაზე – ხან იუნესში სამხრეთით და ჯაბალიაში ღაზის ზოლის ჩრდილოეთით. ხან იუნესში ჰამასმა მოამზადა სცენა მძევლების გადასაყვანად და შეზღუდა  ბრბოს მიახლოება, რათა არ შეექმნათ ქაოსი და თავდასხმის მცდელობები, რაც მანამდე  (30 იანვარს) დაფიქსირდა არბელ იეჰუდისა და გადი მოზესის გათავისუფლების დროს. ამჯერად ტერიტორიაზე  მარტო რამდენიმე ათეული ტერორისტი  შეიკრიბა.

ხან იუნესში პირველი გაათავისუფლეს იარდენ ბიბასი და ოფერ კალდერონი. ისინი ავიდნენ ჰამასის მიერ სპეციალურად მოწყობილ სცენაზე, მათ გადაუღეს პროპაგანდისტული ვიდეოები  და შემდეგ წაიყვანეს  წითელი ჯვრის მანქანებისკენ. მძევლების გადაცემის ცერემონია ხანმოკლე და მწირი იყო.

საზეიმო სცენა ასევე მოეწყო ღაზის საზღვაო პორტში, ზოლის ჩრდილოეთით, სადაც დაახლოებით 10:30 საათზე მოხდა შმუელ (კიტ) სიგალის გადაცემა წითელი ჯვრისთვის. ისიც თავისით ავიდა სცენაზე, თუმცა გაჭირვებით. პორტში ცერემონია უფრო ხალხმრავალი იყო, ვიდრე ხან იუნესში.

წითელი ჯვრის წარმომადგენლებმა მძევლები  გადაიყვანეს ცაჰალისა და შაბაქის პოზიციამდე, იქიდან კი ისინი მალე  ისრაელის ტერიტორიაზე გადავიდნენ, სადაც რეიმში საგანგებო კომპლექსში ნათესავებსა და ექიმებს  შეხვდნენ, იქიდან ვერტმფრენით საავადმყოფოში გაფრინდნენ.

რაც შეეხება ტერორისტებს, რაუნდის ფარგლებში ისრაელის ციხეებიდან 183 პატიმარი გაუშვეს, მათგან 18 იხდიდა უვადო პატიმრობას,  54 იხდიდა ხანგრძლივს, 111 კი დააკავეს 7 ოქტომბრის შემდეგ.

და ვინ არიან გათავისუფლებული მძევლები?

■ 35 წლის იარდენ ბიბასი, შირის ქმარი და ორი “წითურას” – პატარა კფირის და არიელის მამაა. მათ შესახებ ინფორმაცია ამ დრომდე არ არის.  წინა კვირას ცაჰალის  სპიკერმა თქვა, რომ არის  “დიდი შეშფოთება დედისა და მისი შვილების ბედთან დაკაშირებით”. ორი წითური ბავშვი, რომლების  გატაცება ტერორისტებმა ვიდეოკამერით გადაიღეს, მძევლების გათავისუფლებისთვის ბრძოლის სიმბოლოდ იქცა. გატაცების დროს კფირი 9 თვის იყო, არიელი 4 წლის.

■ 65 წლის შმუელ (კიტ) სიგალი, რომელსაც ასევე აქვს ამერიკის მოქალაქეობა,  გაიტაცეს მეუღლე ავივასთან ერთად კიბუც კფარ აზადან 2023 წლის 7 ოქტომბერს. წყვილი ამ კიბუცში 42 წელი ცხოვრობდა. ავივა გაათავისუფლეს ჰამასთან შეთანხმების ფარგლებში 2023 წლის ნოემბერში (მან ტყვეობაში გაატარა 51 დღე) – და მას შემდეგ იბრძოდა, რომ მისი ქმარიც დაებრუნებინა.

■ და მესამე გათავისუფლებული არის ოფერ კალდერონი, ისიც ორმაგი მოქალაქეობის მქონეა, მათ შორის  საფრანგეთის. 54 წლის იუბილე მან  ტყვეობაში აღნიშნა.

ამჟამად ღაზის სექტორში 79 მძევალი რჩება, მათ შორის ცოცხალი  და მკვდარიც. გაცვლის შემდეგი რაუნდი მომდევნო შაბათს გაიმართება.